Psalms 114
Anutuac haka welic welicgia.
1Israel, Yakobo ʒémimia iwac ic embachéra ieneŋ Iʒipte baeciguc acgina méŋ ʒéaŋgic ionac murunec érégic. ▼▼114:1Israel imi Yakoboac qara ɋelia Anutunéŋ ʒémimia. Ic embac acgina méŋ ʒéanʒu imi Iʒipte ic ionac imuhuc ʒézac. Kembaŋa 2 iguc Yakoboac ɋelihéra qacgina qacma Yuda ʒéma muŋguc melemma Israel ʒézac. Yakobonéŋ Yudawac mériaŋ ac sasala ʒéma areŋ imuacnec ic kewu sasala hicŋimac ʒéyec imi niŋɋelimu.
2Nalé imuaru Yuda imi Yaweac ocmuŋ téréya waŋec. Israel imi iwac ama baera waŋec.3Konduŋ imi hémma néŋgacma keŋec. Waŋu Yodan doku acguc héréma andé andé keŋec. 4Baec boŋa imi eneŋ rama iwa ésécnec técgéma aria megic. Baec boŋa komoc komoc imi rama merawa ésécnec imuhuc waŋgic.
5Konduŋ doku gi némac niŋac néŋgacma keŋnec? Yodan doku gi némac niŋac héréma andé andé keŋnec? 6Baec boŋa ini némac niŋac rama iwa ésécnec técgéma aria megic? Baec boŋa komoc komoc ini némac niŋac rama merawa ésécnec técgéma aria megic?
7Baec ini imi miŋ kewuninawac kiwaiguc, Yakoboac Anutu iwac wésiaiguc ʒénéŋ hirihiri wammu. 8Inéŋ baŋa hilaŋeŋ melemma doku ʒékéŋ mihicŋima hoc selia melemma doku hogocya mihicŋianʒac.
Copyright information for
KGF